Ofurhetjur.com

Ninja er búin að vera með svæsna eyrnasýkingu í öðru og bólgur í hinu, hósta og 40c hita. Eyrnasýkingin var það slæm að Ninja litla hljóðaði hér á aðfaranótt miðvikudags og kom ekki upp stöku orði fyrir sársauka, eyrnarörin sumsé virka eins og flísar í eyrunum þegar svona svæsin sýking er á ferðinni og þegar þrýstingurinn er sem mestur, þá er sársaukinn alveg hrikalegur. Í gærkveldi var þetta allt saman á undanhaldi og krúttan komin í banastuð. Hún eldaði hérna með mér og það var kjúklingur sem varð fyrir valinu, við bjuggum til kjúklingarétt, settum hann í eldfast mót, ost yfir og inn í ofn. Hún lagði svo á borðið prinsessan og gúffaði svo í sig kjúklingnum og lék á alls oddi, sprellaði þvílíkt við bróður sinn og fannst allt alveg hreint frábært, enda allt ansi gott þegar maður er laus við nístandi eyrnasársauka. Þegar hún var að verða búin af disknum fékk hún ost upp í sig, sem var orðinn frekar harður því ekki er hún snögg að borða blessunin. Hún tuggði vel og vandlega og svo kom skringilegur svipur á hana og hún sagði: ,,Mamma, mér finnst ekki goggurinn góður!”

Snillingur þessi litla drottning, hún hélt sumsé að hún væri bara að gúffa í sig kjúlla með goggnum, fjöðrunum, fésinu og öllu og var greinilega alveg tilbúin að smakka gogginn (ostinn) eeen fannst hann svo ekkert góður þegar hún var búin að tyggja hann dálítið vandlega.

Þessu á allan hátt óviðkomandi - ég verð að láta fylgja mynd af Skugga sæææta að brosa! Gvuð, hann er guðdómlega fallegur!

Það er aldeilis fjör á þessu heimili. Síðustu dagar eru búnir að vera heldur betur fjörugir. Í fyrradag fórum við í leiksýningu, fórum að sjá Ávaxtakörfuna með Steinku og co og Camillu og co. Ninja og Ísabella hoppuðu og sungu með og fannst þetta sko æðislegt en Skuggi Nóel lét sér fátt um finnast, fékk sér bara sjúss í miðri sýningu og hafði það kósý. Seinnipartinn fórum við í sveitaferð með leikskólanum og það var geggjað. Skoðuðum öll dýrin og grilluðum og skemmtum okkur konunglega. Veðrið var svo æðislegt að við fórum svo bara í beinu framhaldi að gefa öndunum á tjörninni brauð og út á leikvöll. Á morgun er svo afmæli hjá mömmu – hún er fertug gellan! Þá ætlum við sko heldur betur að gera okkur glaðan dag saman og fagna með stæl. Á laugardaginn er fjölskyldudagur hjá vinnunni hans Jóa og þá verður farið í Vatnaskóg í bítið í kassabílarallý, bátsferðir, hoppukastala, candyfloss, pylsur og vonandi sólarglætu, það verður án minnsta efa stórskemmtilegt. Á sunnudaginn ætlum við svo að grafa fyrir sólpallinum, það verður sumsé tekin hér fyrsta skóflustungan og vonandi sú seinasta einnig því við verðum með beltagröfu og ætlum að reyna að keyra þetta bara áfram, vonandi frá upphafi til enda. Kannski er ég hriiikalega bjartsýn en ég vona samt að þetta gangi vel. Við erum búin að panta pallaefnið og það kemur á næstunni, svalahurðin kemur hins vegar ekki alveg strax þannig að það verður ekki sagað út fyrr en seinna í sumar en við verðum þá vonandi bara tilbúin með allt þegar þar að kemur.

Krílakrúttin okkar eru sko eldspræk. Ninja Tíbrá spyr endalaust um allt í heiminum. Ef við segjum eitthvað við hana kemur í henni, af hverju? Ef henni heyrist eitthvað standa á svörunum, til dæmis ef ég er að velta fyrir mér hvernig í ósköpunum ég eigi að útskýra af hverju appelsínur eru appelsínugular en ekki rauðar, þá segir mín bara með enn blíðlegri röddu og horfir stíft í augun á mér: en mamma mín, af hverju? Af hverju er sumsé aðalmálið þessa dagana. Hún er orðin svo gasalega fróð um allt, ég trúi því stundum ekki að hún sé bara tveggja og hálfs því hún er svo ótrúlega klár! Hún er líka með svo mikið stálminni, hún man sko hver stóð á bak við hverja einustu flík í skápnum hennar, man hvort það var jólagjöf eða afmælisgjöf og man eftir því líka hver gaf Skugga hvað. Stundum fer hún inn í herbergi og kemur svo hlaupandi fram eftir smá stund, hoppar í fangið á okkur og segir – TAKK fyrir að gefa mér píanóið! Eða eitthvað álíka sem hún fékk fyrir löngu og þykir óskaplega vænt um – yndislega þakklát og stórkostleg! Sjálfstæðisbaráttan stendur sem hæst þessa dagana, ef við svo mikið sem dirfumst til að hjálpa henni í sokk, þá fer hún úr honum og klæðir sig svo aftur í hann sjálf. Hún er nú alveg ægilega skemmtilegur karakter þessi krútta!

Skuggi Nóel er orðinn skaðræðispjakkur þrátt fyrir að vera einungis eins mánaða. Hann rúllar sér hring eftir hring og vill fá sínu framgengt. Hann sættir sig ekki við það að liggja eins og eitthvað ungabarn í rúmi, hann vill fá að sitja og skoða heiminn eins og eðaltöffarinn sem hann er. Hann brosir svo óskaplega fallega, stundum skríkir alveg í honum og það fyndnasta sem hann veit er þegar Ninja Tíbrá er eitthvað að sprella. Í gær var hann eitthvað ósáttur á meðan ég var að greiða Ninju og þá settist hún hjá honum þar sem hann sat í nuddstólnum (ömmustóll með nuddi), tók utan um hann og sagði blíðri röddu: Skuggi minn, þetta er allt í lagi, ég er hérna hjá þér, ég passa þig ástarengillinn minn. Ein sem fylgist greinilega grannt með því sem ég geri því ég segi þetta alltaf við þau bæði þegar eitthvað bjátar á. Hann er orðinn 4650 grömm, stækkar sumsé og dafnar ansi vel. Hann er mjög mikið vakandi og rosa duglegur að spá og spekulera í öllu í kringum sig. Augun hans eru að verða dökkbrún, alveg sjúklega falleg! Enda svosem ekki við öðru að búast þegar við erum bæði brúneygð. Það sést glitta í tvær tennur í neðri góm, framtennurnar tvær, þær sjást í gegnum holdið, ég veit reyndar ekkert hvort þær eru að koma upp en það er allavega ekki langt í þær, hvort sem þær eru á uppleið eða bara í biðstöðu. Hann er nú alltof lítill til að fá tennur, enda engin not fyrir svoleiðis þegar hann er bara á brjósti.

Það er sumsé mikið fjör á þessu heimili og komnar inn fullt af myndum frá síðustu dögum! =)

Skuggi Nóel pollslakur í baðinu.

Ninja Tíbrá eldhress í baðinu.

Ég með Skugga Nóel sofandi í burðarpokanum í sólskininu í sveitaferðinni.

Jói og Ninja Tíbrá í sveitaferðinni að knúsa lítinn hvolp.

Ninja Tíbrá fékk hjól og hjálm í sumargjöf, heldur betur alsæl með það daman. Við fórum í hjólatúr á mánudaginn, þegar heimilisfaðirinn var fjarri góðu gamni að taka upp auglýsingu um allt land. Skuggi Nóel kúrði í vagninum og Ísabella Sól, Patrik Dagur og Ninja Tíbrá hjóluðu alsæl á nýju hjólunum sínum. Ég var sumsé með grísina hér heima á meðan Jói var úti á landi í tvo daga og það gekk bara blússandi vel, þau eru svo góð þessar dúllur.

Skuggi Nóel er orðinn fjögur kíló og er að safna sér fínni undirhöku. Hann er mun meira vakandi núna en hann var fyrstu tvær vikurnar og er til dæmis alltaf glaðvakandi milli 01:00 og 03:00 á nóttunni, rétt eins og hann var alltaf í bumbunni. Við mæðgin erum sumsé bara vakandi hér saman núna á meðan Jói sefur hér værum blundi við hliðina á okkur og Ninja sömuleiðis í næsta herbergi.

Ninja og Skuggi voru að leika inni í herbergi áðan, Skuggi lá á leikteppinu og Ninja var í óða önn að raða á hann dóti, láta hann gera allskonar í leiknum og hann var greinilega að standa sig vel sem leikfélagi því hún var alltaf að klappa honum, kyssa hann og segja honum hvað hann væri nú duglegur að læra að leika sér, (hún er sumsé mjög meðvituð um sitt stórusysturhlutverk, að kenna honum allt). Ég var þarna hjá þeim að brjóta saman þvott og fylgjast með, voða fallegur teboðsleikur. Svo allt í einu er mín bara sármóðguð og hún er sko ekkert ánægð með hann sem leikfélaga lengur. Ég fer að spyrja hana hvað hafi komið uppá og þá tilkynnir hún mér það að það sé nú bara ekkert fallegt af Skugga Nóel að sofna í miðju teboði, hann átti sko að fara að fá sér súpu í leiknum, sem hún var búin að vera að elda en sofnaði bara í staðin! Maður á sko ekki að sofna í miðjum leik, það vita það nú allir! ..Hann á greinilega margt ólært töffarinn og skvísan á nú eflaust eftir að standa sig ljómandi vel í að kenna honum þetta allt, stjórna honum, það finnst henni alltaf einstaklega skemmtilegt. Æj þau eru alveg hrikalega mikil krútt þessir gormar! =)

Við ætlum að skella okkur til Akureyrar á morgun, nýta löngu helgina! ..Vúhú!

Í gær var settur dagur og mér fannst stórkostlegt að eiga tveggja vikna töffara í stað þess að vera með risavaxna bumbu og þreytt á að bíða.

Annars er allt í lukkunnar velstandi, héldum hér vöfflupartý í gær fyrir alla stórfjöskylduna - hér vorum við vísitölufjölskyldan, mamma, pabbi og Doddi, Steinunn, Siggi, Patrik og Ísabella, amma á eski, pabbi og Dísa og Jonni, Jóhann Grétar og Svavar Karl - alveg hreint yndislegt. Svo komu Andrea og Jakob um kvöldið og við grilluðum saman - yndislegur dagur sumsé =)

..Það eru komnar inn nýjar myndir!

Það er óhætt að segja að það sé fjör á þessu heimili. Þvottavélin, fíni sænski fjölskyldumeðlimurinn er búin að standa sig eins og hetja síðustu daga því Ninja er búin að vera svo agalega mikið lasin greyjið að hún hefur engu haldið niðri, hvorki mat né drykk. Í gær var dagur fjögur í þessum miklu veikindum og okkur leist ekki lengur á blikuna þegar hún hætti að tala við okkur og skelltum okkur á Bráðamóttöku Barnaspítalans. Hún var lögð inn með vökva í æð skvísan og við horfðum þarna á fullt af skemmtilegum teiknimyndum á meðan hún ,,drakk með hendinni.” Við þetta hresstist hún öll og fékk sér að borða eeen um leið og vökvinn var tekinn úr hendinni í gærkveldi og við komin út í bíl, skilaði hún öllu. Við fórum heim og hún sofnaði og svaf þar til við fórum aftur upp á spítala í morgun og þá fékk hún aftur næringu í æð því ekkert virtist enn haldast niðri. Núna er hún sofandi gellan og búin að sofa síðan við komum heim fyrir rúmum klukkutíma. Við vonum bara að núna sé þetta allt á undanhaldi enda eru tveir dagar á spítala og fimm dagar í heildina alveg nóg fyrir okkur öll. Það væri ljómandi gott að dagur sex, morgundagurinn, yrði bara batadagur. Ungfrúin litla er samt svo mikil ofurkona, alltaf sami harðjaxlinn því í gær þegar við vorum að keyra á spítalann sagði ég við hana að við ætluðum að kíkja til læknisins og sjá hvað hann myndi nú segja og þá kom í minni, ,,ó - hver er lasinn?” Hún játar sig sko ekki sigraða fyrr en í fulla hnefana en í gær, var hún orðin afar ólík sér eeen hélt nú samt áfram að vera harðjaxlinn sem við þekkjum svo vel og jákvæð alveg út í eitt! Viðurkennir sko ekkert að hún sé lasin =)

Skuggi fékk afar væga útgáfu af þessu og var aðeins argur og leið illa í tvo sólarhringa en er núna allur að koma til. Brjóstamjólkin er víst svo mikið súperenerdjí að svona krílakrútt verða aldrei mikið lasin.

Ninja er bara að halda okkur við efnið, láta okkur þrífa aðeins, við erum búin að þrífa allar sængur og kodda, rúm, sófann, gólfin, bangsa, útiföt, bílinn, bílstólinn - þannig að hér er bara alsherjar hreingerning. Fínt að hún sjái til þess að við foreldrarnir séum ekki að tapa okkur í einhverju tjilli í fæðingarorlofinu

Annars eru nú komnar inn nokkrar nýjar myndir í myndaalbúmið - svo sæt þessi börn =)

Skuggi Nóel sæti gaur!

Ninja Tíbrá sæta krútta svo dugleg á Barnaspítalanum!

..heitir fallegi prinsinn okkar.

Hann fékk nafnið sitt hérna heima við yndislega athöfn í dag, hann heitir Skuggi Nóel. Merking Nóel er kraftaverk sem okkur finnst auðvitað ofboðslega fallegt og merking nafnsins Ninja er ósigrandi! Þau eru sumsé bara flottust þessi stórbrotnu börn okkar!

Takk æðislega fyrir okkur allir, yndislegt að hafa svona góðan hóp hérna í dag og stórkostlegt hvað allir eru yndislega hugulsamir, hjálplegir og sætir í sér.

..Myndir úr skírninni og frá þessum fyrstu dögum eru komnar inn í myndaalbúmið!

Knús í krús - Anna Sigga, Jóhann Þórir, Ninja Tíbrá og Skuggi Nóel.

..er mættur á svæðið! Hann fæddist 10.apríl kl.04:37 - hann er 14 merkur og 51 cm og fæddur eftir 38 vikna meðgöngu, fullkominn, vær og góður. Það eru komnar myndir í myndaalbúmið sem finnst hér að ofan, hérna eru nokkrar sætar frá síðustu klukkutímum =)

Nokkrum mínútum eftir fæðingu..

Óskaplega fallegur!

Alveg óskaplega þreyttur eftir þessa löngu ferð - fínt að kúra bara =)

Kominn til stóru systu - Algjörlega fallegustu systkini í heiminum!

Vísitölufjölskyldan í Fellsmúla - Jói, Anna Sigga, Ninja Tíbrá og litli kútur

Flottur gaur, tjillar bara enda ekkert til að stressa sig yfir í þessu ljúfa lífi.

Yndislegi frændsystkinahópurinn - Patti ótrúlegur ,,paparatsí” að taka mynd af aksjóninu!

Ninja Tíbrá er auðvitað heimsins sætasta barn, hún er búin að biðja um að fá eyrnalokka ansi lengi núna og sagði alltaf þegar hún lá í fanginu á mér: ,,mamma, mig langar svo í svona enga lokka!” og benti á eyrnalokkana. Auðvitað fannst mér þetta krúttlegast í heimi og þar sem daman er rúmlega tveggja og hálfs árs mátti hún nú alveg fá eyrnalokka fyrst hún þráði það svona heitt. Hún fékk að velja sér lokka til að láta setja í og var í valkvíðakasti í 10 mínútur því úrvalið var svo æðislegt, allir heimsins litir og allskonar týpur, á endanum ákvað hún nú samt að fá sér stjörnur í eyrun eins og ég er alltaf með. Þetta var ekkert mál og hún er vægast sagt í skýjunum með þetta sæta músin!

..Þegar hún fær eyrnabólgur segir hún líka alltaf: ,,Ég er í fríi á leikskólanum, ég er nebbla með enga bólgu!” Jeremías, mér finnst hún svo sæt!

Ég er að verða komin 35 vikur og þá á ég að hætta á hríðastillandi lyfjunum. Þau geta nú samt verið virk fram að páskum þannig að þá ætti hann nú að láta sjá sig, eða um það leyti allavega. Spennó - spennó!

Þegar ég var ólétt af Ninju las ég bókina ,,konur með einn í útvíkkun fá enga samúð” og í gær þegar ég fór í skoðun til ljósunnar minnar og hún sagði mér að ég væri komin með ca. einn í útvíkkun, þá fór ég að skellihlæja og datt mér í hug þessi fíííni titill. Ljósan sagðist nú reyndar alveg vera til í að veita mér alla þá samúð sem hægt er að gefa eeen ég sagði henni að ég þyrfti ekkert slíkt. Hún var nú afar ánægð með að ég væri að taka þetta bara á jákvæðninni blessunin. Ég verð bara áfram undir ströngu eftirliti til að fylgjast með litla gaur og hvort hann er nokkuð farinn að erfiða. Það er sumsé komin fæðing í gang, reyndar búin að vera í gangi ansi lengi því áður en útvíkkunin byrjar styttist leghálsinn og svona þannig að já, hann er hægt og rólega að koma blessaður drengurinn. Það getur nú samt alveg vel verið að hann hangi þarna inni í nokkrar vikur í viðbót í tjillinu en ekki fram yfir settan dag (í dag eru sumsé 7 vikur í setta daginn, 23apríl). Þetta þýðir bara að lyfin sem ég er búin að vera að taka eru að svínvirka því annars væri drengurinn einfaldlega fæddur og útvíkkunin löngu búin fyrst hún er að byrja á annað borð.

Það sem mér finnst reyndar mun verra er að ég er með svokallað lífbeinslos vegna þess að hann er svo neðarlega og þrýstir svo mikið. Þetta er skilgreining internetsins á lífbeinslosi:

,,Það sem er verst og hefur mestar afleiðingar af grindarverkjum er svokallað lífbeinslos. Þá verður los í lífbeininu og bilið sem það á að fylla upp í víkkar. Þetta veldur konunni miklum verkjum og í verstu tilfellunum geta konur ekki gengið nema með hækjum eða þurfa jafnvel á hjólastól að halda, einstaka konur þurfa að fara í aðgerð eftir fæðingu vegna þessa.”

Ég haltra eins ekta bandarísk húsmóðir í Wallmart sem er að kafna úr offitu og getur þess vegna ekki gengið eðlilega, ég sem sór fyrir lifandis löngu að verða aldrei svona hriiikalega ólétt. Mér líður ögn eins og þegar ég gekk á hælbrotinu mínu í nokkra daga í gamla daga, það var ekkert sérstaklega gott að vera fótbrotin og labba og læknirinn sagði einmitt um daginn að þessi lýsing myndi akkúrat ná þessum hrikalegu verkjum.

Ég er nú samt bara að taka þetta á húmornum eins og annað, þetta verður allavega til þess að ég verð afar þakklát fyrir það að geta gengið þegar ég get loksins gengið eðlilega! Eitthvað sem ég hef aldrei pælt í að vera þakklát fyrir áður! =)

Aðeins að öðru en meðgöngu litla töffarans. Það er nú heldur betur orðin spurning um að fara að sænskuvæða heimilið endanlega, segja bara upp íslenskunni og kenna Ninju og mér sænskuna því Jói er auðvitað uppalinn í Svíþjóð og skellir oft ægilega skemmtilegum sænskum orðum inn í miðjar setningar. Svo núna vorum við að fá okkur nýja þvottavél því okkar var úrskurðuð látin og nýja vélin, talar eingöngu sænsku! Jói og vélin eru orðnir mestu mátar og mér þykir afar óvanalegt að sjá ekki algerlega um þennan hluta heimilislífsins því hann þarf jú að þýða fyrir mig það sem þvottavélin er að reyna að segja mér og gerir þetta bara sjálfur í staðinn. Kannski er þetta bara einstaklega mikið lán eftir allt saman