Ofurhetjur.com

1245

Margir hafa reynt að geta sér til um nafnið sem litlan okkar fær og enn fleiri komið með sitt innlegg í nafnaflóruna. Það er bara gott og blessað og ég hef mjög gaman að því að fólkið okkar sé með getgátur. Valgerður Helga sem býr á efri hæðinni (5 ára dóttir Andreu, systur Friðgeirs) hefur þó verið frjóust af öllum hvað varðar hugmyndir. Hún er alveg ólm í að vita nafnið og var í allan gærdag að aðstoða okkur við að undirbúa skírnina og vildi helst fá að hjálpa til með allt þessi elska. Hún benti okkur fljótt á að nafnið yrði að vera nógu auðvelt svo litla gæti skrifað það allt þegar hún er 5 ára - það fannst henni vera lykilatriði hvað varðar nafnaval. Hún tilkynnti mér í gær að hún sko orðin 5 ára og getur sko alveg gert allt sem þarf að gera fyrir svona skírn, hún kann að baka og sauma og syngja, hún er búin að læra þetta allt og getur sko alveg hjálpað til! Þær systur hérna uppi eru alveg heillaðar af litlu og eru duglegar að koma og líta aðeins á hana, bara svona því hún er svo falleg. Valgerður er búin að ákveða fyrir löngu hvað litla á að heita en kemur svo alltaf með nýjar uppástungur annað slagið. Í gær sat hún í stofunni og hélt á litlu og allt í einu ljómaði hún öll og sagði svo: ,,Ég veit, ég veit sko alveg hvað hún á að heita!” og ég spurði hvað það væri: ,,núh auðvitað Þyrnirós! Það passar svo vel!” Núna er þessi litla krútta alveg viss um að við munum skíra Þyrnirós og er farin að kalla hana Þyrnirós alltaf þegar hún sér hana. Ég reyndi mitt besta til að útskýra fyrir henni það að á Íslandi mætti því miður ekki heita Þyrnirós en það fannst henni ólíklegt því litla stelpan í spólunni hennar (Þyrnirósarteiknimyndinni frá Disney) myndi tala íslensku og myndi heita Þyrnirós! Þar með var það útrætt

..við settum inn glás af fínum myndum!