Ofurhetjur.com

Það var heldur betur fjölmennt á heimilinu síðastliðna viku. Mamma, pabbi, Þorgeir Kristján, Steinunn, Siggi, Patrik Dagur og Ísabella Sól komu til okkar og fóru áðan. Þau lentu klukkan sex um morguninn á síðasta föstudag og ég og Ninja Tíbrá gátum að sjálfsögðu ekki látið okkur vanta við hliðið þegar þau myndu ganga inn á danska grundu. Við fórum því í lestina um miðnætti á fimmtudeginum og komum til Kaupmannahafnar á þeim tíma sem vélin lenti. Þau höfðu ekki hugmynd um að við værum að koma þannig að þau voru aldeilis glöð og hissa þegar þau sáu eiturhressar danadrottningar hoppandi spenntar við útgönguhliðið á flugvellinum. Við gistum eina nótt í Kóngsins Köbenhán og fórum svo til Álaborgarinnar okkar. Við fórum í dýragarð, lególand, verslunarferðir, fleiri verlsunarferðir, skoðuðum flatlendið, rúntuðum danaveldi þvert og endilangt og gerðum fleira dúndurskemmtilegt. Þorgeir Kristján fékk að halda á slöngu í dýragarðinum, hann er nú meiri hetjan! Ég sé mig í anda vera ellefu ára og halda á risaslöngu, ég hefði líklegast ekki náð fermingaraldri sökum vansveftu og tilheyrandi martraða!

Krakkarnir skemmtu sér aldeilis vel saman og Patrik Dagur reif af sér brandarana. Í lególandi fór ég í fyrsta skipti á ævinni í rússíbana og maður lifandi, ég hélt að það yrði mitt síðasta! Ég var raddlaus og gat varla andað þegar ég kom út vegna þess að ég gargaði úr mér raddböndunum og öllum líffærum án þess að hafa tekið eftir því. Þorgeir Kristján tók rússíbanaferðinni með jafnaðargeði og stóískri ró og passaði upp á að stóra systir myndi ekki missa vitið við hlið hans.

Friðgeir er að fara í stóra lokaverkefnisprófið á morgun! Hann er búinn að búa uppí skóla og missa af raddleysi konu sinnar og stemningunni upp á síðkastið. Hann fær nú samt sem áður eitthvað fyrir ómakið, eins og eina b.sc. gráðu í viðbót eða svo, það er nú vissara að eiga að minnsta kosti tvær upp á að hlaupa. Klukkan níu í fyrramálið er sumsé prófið og stendur það yfir í átta klukkutíma og er munnlegt. Ekki get ég sagt að ég öfundi hann. Við mæðgur ætlum að mæta í klappstýrumínípilsum og hvetja hópinn áfram! ..Endilega sendið fallegar og hnyttnar arkítektahugsanir á dönsku til hans á morgun.

Ég fór í sjálfsögðu í gegnum myndirnar og valdi gullkornin (sem eru hátt í annað hundrað) og skellti þeim inn á alnetið öllum til yndisauka! Bæði eru ný myndaalbúm í maí- og júnímöppunum. Á myndunum má sjá marga mjög fyndna svipi hjá gellunni sem eru aðalmálið þessa dagana, henni finnst sko langskemmtilegast að gretta sig, enda er hún dóttir móður sinnar - sjaldan fellur eplið langt frá eikinni! Á myndinni hérna fyrir ofan eru sætustu frænkurnar, Ninja Tíbrá og Ísabella Sól inní kofa í Lególandi þar sem þær stóðu óstuddar hlið við hlið og léku sér og spjölluðu heillengi!

..Jæja, núna eru báðir vísarnir á klukkunni komnir óþarflega langt frá miðnætti hérna í Danmörkinni og tími til kominn fyrir örþreytta móður að fara einsömul í rúmið. Mikil lifandis skelfingar ósköp verður gaman þegar Friðgeir verður búinn í prófinu og kemur heim og hlýjar á mér tásunum!